Donald show Jagdeo he balls
NOVEMBER 3, 2015 | BY KNEWS | FILED UNDER DEM BOYS SEH, FEATURES / COLUMNISTS, NEWS
Dead nah done, cry nah done is one old people saying. Another is that all skin teeth nah laugh. But de best of them all is what is play fuh li’l boy is dead fuh crappo. Something happen Saturday that mek dem boys remember all dem saying. A young Guyanese policeman get shoot and killed in New York. Wid support from de American government, de boy family decides to bring de body home to be buried. All that was good; nobody didn’t pay too much attention till dem hear that about 60 NYPD officers was coming. Jagdeo hear this and disappear. Some people seh that he never lef he house, some seh that he send he vehicle to Berbice to fool people and head to he best friend house in Ogle. Don’t ask why he go to all this trouble. He really believe that dem police was coming to arrest him. Things get funny when some of dem call Donald. Jagdeo believe that de police ask Donald about him so he wait till dem lef and he cuss Donald. Fuh de first time Donald show that he got some balls, that he could do things he own way just like de Frank Sinatra song wha he sing de other day at de wake house. He answer Jagdeo word fuh word. When he done he tell Jagdeo that he would never get a chance to run Guyana again. That story been in de papers. Just like how Donald and Jagdeo got a rift between dem, de people who does organize Diwali got a rift. One set seh that Diwali is next week Tuesday and de other seh that is next week Wednesday. Dem boys seh that fuh peace de government should tek all two days and mek dem holiday. While Rum Jattan deh pun that he could name a couple of days to celebrate events. Just like how Soulja Bai name November 1 as Defence Force Day, Rum Jattan could name a Bush Meat Day, a Rum Drinking Day, a Duck Curry Day and a Cuss Out Day and Rest Day. Dem already got Senior Citizens Day and de whole APNU leadership does celebrate pun that day. All dem boys asking for is dem special day. Talk half and wait fuh you special day.
