Doan mek life hard fuh yuself
OCTOBER 30, 2015 | BY KNEWS | FILED UNDER DEM BOYS SEH, FEATURES / COLUMNISTS, NEWS
De colonial masters put measures in place to mek dem wuk easy. Dem build jail fuh hold prisoners because dem couldn’t spend dem time sitting down and watching de criminal all de time. Wid a jail he can go home and sleep. De same colonial people mek car and bicycle and motorbike because dem know that dem didn’t have to walk all that distance. And besides, dem could cover distance in labba time. That is how people living to this day. But Scotty ain’t learn because he behaving like he and Jagdeo been to de same school. When Jagdeo was President he was everything. He had a Finance Minister but he been to all de Finance Conference. He use to run all dem Ministry. That is wha dem people does call micro-managing. Scotty deh in de same position. He hear some people digging up de side of de road and carrying away de material. Dem boys seh that de people operate like if de roadside was dem mother own because dem bring truck. And was no ordinary truck. Instead of Scotty carry de police or call some staff, he go heself and arrest de people. De people freeze in shock when dem see Scotty. If that didn’t happen somebody woulda give Scotty a good cut-tail. But he who do stupid thing does live to do more stupid thing. That is why Jagdeo still doing more stupid thing like telling people to tek dem money out of de bank and keep it under dem pillow. Dem boys want to know if in this day and age people so stupid, knowing that bandits coming in you house to thief when you ain’t even got nutten. Talk half and watch how people does mek life hard fuh demself.
